الأحد، نوفمبر 14، 2010

فكره شعار الحزب الوطنى


       كانت قضيه اغلاق الجرائد والبرامج التلفزيونيه حديث المثقفين فى الفتره الفائته وكان محور الحديث فى هذه الفتره هو ان ذلك اتجاه من الحكومه لتكميم الافواه وحبس الاصوات بداخلها  وان ذلك مؤامره على الديموقراطيه والحريه فى مصر لقتلها قبل ميلادها اصلا وفى الواقع- واظن انك عرفت اتجاهى من هذه الكلمه فلا احد يقول فى الواقع وفى الحقيقه الا اعضاء الحزب الوطنى- ان هذه التوقعات والاراء كلها تعبر عن افتراض سوء النيه فى الاخرين .
      فبعمليه ربط افكار واحداث بسيطه نستطيع ان نؤكد ان هذا المسلك من حكومتنا الميمونه هو مسلك وطنى مئه بالمئه . فمنذ عام 2005 والحزب الوطنى يهتم بالامور الاقتصاديه والاستثماريه وانه يأمل ان يزدهر الاستثمار وينمو كما تزدهر اوراق شجره الصفصاف وتنمو برده . ومما يؤكد ذلك هو هله الحاج جمال اول امبارح مع خيرى رمضان افندى على التلفزيون الحكومى المقدس ذكره فى برنامج مصر النهارده المعفن وقال ان الاقتصاد ما بيوكلش الناس بس هما مايقدروش يعيشوا من غيره ولحظوا انه قال الاقتصاد اللى هو التلفزيون والورق مش دول برده اقتصاد؟ الاجابه : نعم هما اقتصاد
    اذن لابد ان نعلم جيد جدا _مش لحاجه. بس عشان نريح نفسنا بس ومنفضلش نفرك ونقول طيب هما بعتوا تحذير لمنى الشاذلى ليه هيا عملت حاجه دى بتستضيف فنانين فى الفتره دى وبتتكلم على النت والحاجات دى_ ان المشكله مش فى معارضه ولا فى صحافه ولا فى فضايح ولا هما عايزين يزوروا انتخابات ولا حاجه خالص – ايون اسمع اللى بقولك عليه –يا جماعه الناس دى بتعمل حاجه وطنيه هما عايزن يقللوا استهلاك الفرد للاشياء اللى ملهاش لازمه علشان يخلوه يحط الفلوس دى فى اشياء ليها لازمه – يا ابن اللعيبه يا انا كتبت الشويه دول ازاى –
هبسطهالك : التلفزيون مثلا انت بتقعد كل ليله قدام التلفزيون عاملى فيه جيفارا تنقل من ابراهيم عيسى تروح لعمرو اديب وبعدين ترجع لحمدى قنديل وانت معدى على حمدى قنديل تلاقيهم مستضفين احمد فؤاد نجم تقعد تسمع بقى طول الليل قوم يحصل ايه تجيلك فاتوره كهربا كبيره ما انت بتسمع ياما وايه كمان عينك توجعك ما انت مقرب من التلفزيون وطبعا عايز كشف ونظاره وموال وايه كمان ممكن التلفزيون يسخن يروح عامل خط اسود على الجنب تقوم عايز تصلحه تروح للراجل يقولك مايتصلحش مش تروح بقى تتنيل على عينك بوظت التلفزيون ابو 2000 جنيه لا تقول انا لازم اشترى تلفزيون تانى وب4000 جنيه عشان ميبوظش امال هتتفرج على ابراهيم عيسى فين ادى التلفزيون واللى بيجلنا منه.
زعلان من ايه تانى اهه من الجرائد نفس الموضوع ورق كل يوم وطباعه وحبر وفى الاخر تاخد كل يوم جرنال بجنيه دا لوكنت بتقرا الدستور بس هتكتفى بيها. اما بقى لو كنت بتقرا جريده تانيه من اياهم فهتعوز تجيب واحده كمان قال الواد مثقف قوى وادفع يا سيدى 2 جنيه . دا غير الاضرار الاخرى والتى تشبه فى اعراضها اضرار التلفزيون من حيث ضعف النظر والنظاره والكهرباء ستقول لى ولماذا الكهرباء اقولك بتقرا المسائى فين فى الضلمه !
هذه فقط الاضرار الماديه والصحيه الناتجه عن مشاهده التلفزيون وقراءه الجرائد ناهيك عن رسائل الموبايل و مواقع النت والمدونات ومصادره الكتب ومنعها.
اريدك انت ان تخبرنى كيف نلوم الحزب على اتخاذ مثل هذه الانجازات ولا نشكره عليها؟
اى عقل يرفض كل هذه المنفعه الماديه والصحيه _فلوس الكهرباء وال2 جنيه بتوع الجرائد_؟
اجل اراك قد شارفت على الاقتناع بهذه الانجازات العظيمه ولكن لديك سؤال محشورا فى احشائك وهو لماذا يفعل الحزب هذا بهذه "الطريقه"_4,4,2_؟
واقول ان الحزب كان لديه خيارين فى تطبيق نظريه التوفير هذه . وهذان الخياران ليس لهما علاقه بالخيارالثالث وهو ان اوروبا كلها بتستخدم4,4,2
الخيار الاول : ان يحظر التلفزيون تماما و نهائيا ولكنه وجد ان هذا سيكون حل غير صائب خصوصا انه جرب هذا الخيار مع اشياء مشابهه كالحشيش والبانجو وكانت النتيجه ان كل الناس بدأت تشربه فى الخفاء الا الضباط فكانوا يشربونه فى القسم علنا
اما الخيار الثانى: فهو ان تكّره الناس فى التلفزيون ان تجعلهم يلعنون اليوم الذين اشتروا فيه هذه الاله اللعينه فعندئذ يهرعوا الى بيعه بنفس راضيه . وقد لاقى هذا الخيار قبولا شديدا فى ارجاء الحزب العتقيق _مش عتيق قوى تمام كده يا باشا _فعمدوا الى التعنت مع الصحفيين ومقدمى البرامج الشرس منهم حيث انهم يرون ان المقدم الشرس شر لابد التخلص منه والغير شرس _اصل الحكايه دى اذواق_ لان لهم هدف نبيل وهو ابعاد الناس عن التلفزيون حتى ينتبهوا لمصالحهم

   ولذلك وبعد نجاح هذه الحمله النبيله المقصود بها ابعاد الناس عن التلفاز فقط _ متخليش نظرك يروح لبعيد_ظهرت اصوات فى الحزب الوطنى تحذق بشده من اجل جعل شعار الحزب فى الفتره البرلمانيه القادمه " مش كان عيالك اولى بيهم " الا انه قد ظهرت اصوات اخرى اقل حذقا ولكن ملحها كتير وطالبت بجعل الشعار "عشان تطمن على مستقبل اولادك بيع التلفزيون" وبالفعل كانت الغلبه للملح لان الحذق مش جايب همه اليومين دول
ولذلك ولاسباب اخرى _ محدش يسالنى عليها _ قررت الا اسئ الظن فى اى تصرف يصدر عن الحزب الوطنى وان اواظب على سماع اغنيه " وأدى جزاة اللى ما يسمعش كلمه ماما قالتها"
ملحوظه: (LG) نوعه (IQ) حاجه يابانى محصلتش استخدام طبيب وعايز فيه 700 جنيه عشانك بس وعشان احنا داخلين على عيد وكل سنه وانتوا طيبين
حصريا..دا كان الشعار القديم اللى اترفض

هناك 6 تعليقات:

  1. جينا نهني بالعيد ونقول :

    الله يتقبل اعمالك ومبارك عليك العيد
    و يعود عليك بصحه وسعاده وعمر مديد

    ردحذف
  2. كل عام وانتم بخير يا دكتوره

    ردحذف
  3. كوكو
    انت فاكر التلفزيون زماااااان
    لو انتا من مواليد السبعينات او بداية التمنينات هتفهم قصدى
    لكن لو انتا من مواليد التسعينات يبقا انسا

    انتا عارف هما الودودهم لايكون فيه تلفزيون ولاحتى كهرباء من اساسه علشان هما عيزينها عتمة فى عتمة
    وعلى راى نزار قبانى كان فيه حاجة قالها كدا على مااتذكر انها بتقول :
    ايا وطنى
    جعلونى لا اراك الامن شاشة التليفاز
    فكيف اراك
    ازاك انقطعت الكهرباء
    على العموم برضو رسالتك وصلت
    تحياتى
    ملوظة
    رجاء الغاء التدقيق فى التعليقات

    ردحذف
  4. لقد تم حذف التدقيق
    شكرا لمروركم

    ردحذف
  5. كثر الف خيرك يا عم كوكو انك وضحت لنا الصورة الصحيحة والمأرب الغبقرية
    والشعار الجديد
    سعدت بوجودى الاول عندكم

    وكل عام ونحن مستلبون واااااا بخير

    تحياتى وتقديرى

    ردحذف
  6. اهلا بكم
    وشكرا لمروركم الكريم

    ردحذف