الأربعاء، أكتوبر 12، 2011

لا لـ" ابو حصيره"

ليا قصه مع ابو حصيره ده ساحكيها
من سنتين تلاته لما بدأت اعرف عن موضوع ابو حصيره ده كنت مستفز جدا
كان نفسى انزل دمنهور واروح دمتيوه دى خصوصا انى من البحيره ودمنهور مش
بعيده عن المكان اللى اسكن فيه.
بس بصراحه كنت خايف..خفت لما شفت وائل الابراشى مصور عربيات الالمن المركزى
اللى بتأمن المولد ده..ولما كنت باسمع الحكاوى انهم بيحبسوا القريه(دمتيه)دى ثلاثه ايام فى
بيوتهم حتى ينتهى المولد..بس كان خوف يساوره شك..كنت شاكك ان الاعلام بيحاول يخوفنا كعادته
علشان محدش يروح هناك..مكنتش اعرف انهم بيعرضوا القضيه بامانه وشرف..اعذرونى بقى مش متعود على كده
..وفى مره قابلت واحد صاحبى بالصدفه فى الكليه فى اسكندريه وهو كان من دمنهور وفضلت اسأله هو ساكن فين..
وقالى انه ساكن فى قريه جنب دمتيوه ولازم يعدى عليها وهو رايح وجاى عشان يقدر يوصل الكليه..يعنى يعتبر ساكن فيها
فكنت عندى فضول جدا وفضلت اسئله عن المولد ..الكلام ده كان فى 2009 ..الولد الصراحه كان خايف اول ما سمع الاسم
..وبعد كده قالى بصوت واطى"خايف لايكون فيه امن فى المكان"..دا رعب يابنى..قالى ممنوع حد اصلا يقرب من المكان ده خالص اثناء المولد..دول عاملين لنا رعب...فانا خدتنى البطوله وقلتله انا نفسى اتظاهر ضد المولد ده..قالى ما انصحكش..لان اى حد بيقرب من المكان ده بيعتقل على طول..وان معظم الناس اللى بتتظاهر بيكون لها ملف فى امن الدوله زى الاخوان وغيره..ومن بعد كلام صاحبنا واحباطه ده-وهو كان عنده حق صراحه-بقيت باسمع عن المولد ده طشاش..وسمعت انه اتعمل السنه اللى بعديها كمان.
المهم مرت الاحداث وقمنا بثوره..وخوفى وجبنى ده اتغلبت عليه..ونزلت الميادين فى دمنهور واسكندريه وقضيت فى التحرير 11 يوم..تغيرت تركيبتى الكيميائيه تماما..واصبحت كائن غير قابل للذل ..لدى رغبه شديده فى الموت من اجل كرامتى ..فعلا والله ..وده سر ما قلتهوش لحد..انا حاليا نفسى اموت ولا ان شئ ضد كرامتى وكرامتى وطنى يحصل...واقسمت يمننا لن اقهر بان مولد ابو حصيره مش هيتعمل تانى ابدا..ولو اتعمل السنه دى "ديسمبر 2011"سانزل اتظاهر حتى لو بمفردى والله على اقول شهيد حتى لو كلفنى ذلك حياتى كلها..لان الموضوع بالنسبه لى مش ابو حصيره بس ..الموضوع بالنسبه لى الثوره على حاجز الخوف اللى سببهولى امن مبارك لعنه الله بسبب هذا المولد
وقررت المشاركه مع حركه"مدونون ضد ابو حصيره" الكترونيا


هناك تعليق واحد:

  1. hi wawakoko.blogspot.com blogger discovered your website via yahoo but it was hard to find and I see you could have more visitors because there are not so many comments yet. I have discovered website which offer to dramatically increase traffic to your site http://xrumerservice.org they claim they managed to get close to 1000 visitors/day using their services you could also get lot more targeted traffic from search engines as you have now. I used their services and got significantly more visitors to my site. Hope this helps :) They offer backlink seo ranking backlinks high quality backlinks Take care. Jay

    ردحذف