الجمعة، مايو 09، 2014

قافلة الاسكندرية الطبية الى الشلاتين و حلايب و أبورماد



الحمد لله رجعنا من #القافلة_الطبية_و_الجراحية_لحلايب_و_شلاتين 
واعتقد انها كانت تجربه مفيده ليا شخصيا تستحق عناء السفر (36 ساعة = 18 رايح و 18جاى)  #نفخ
وكانت ناجحه من حيث الرسالة و الخدمة الطبية اللى القافلة قدمتها لاهل #شلاتين(اكثر من 2000 كشف و 1200 روشته و 50 عملية جراحية ومئات التحاليل الطبيه ) ده غير الفحص و حملات التوعية اللى كانت شغاله على مدار 3 ايام
وكونها اول قافلة تطلع من طب الاسكندرية ده بيعطيها بونص زيادة عن اى قافلة اخرى
على الرغم من ان هناك قوافل تخرج من وزارة الصحة بشكل دورى لكنها
ليست مفيدة للناس هناك لان الطبيب اللى بيروح بيروح يقف لوحده فى مستشفى مفيهوش اى تجهيزات
و لا خدمة طبية و لا بادرة لتقديم خدمة اصلا !
يكفيك تعرف ان فريق التخدير اللى كان معانا كان خايف ان الاجهزة اللى هناك تكون مش شغاله وده لان فى تاريخ شلاتين كلها لم تجرى جراحة تحت general anesthesia
و من ناحية الرؤية والرسالة اعتقد ان عمل كهذا يعد من اسمى الاعمال اللى ممكن المجتمع الطبى يشارك فيها
لما تحققه من نفع و عائد مباشر على المرضى اللى كتير منهم لم يذهب لطبيب من قبل
ده بالنسبة للجانب الطبى اما عن الجوانب الاخرى خصوصا الاجتماعى ففيه شوية نقاط حابب اسجلها
*اولا : الناس هناك كأى حد فى مصر زهقانين و طهقانين فى عيشتهم ولكن اللى مش زى اى حد فى مصر انهم بيترجموا الشعور بالزهق والضيق و الضنك ده الى حالة من المظلومية بيعيشوا نفسهم فيها وده بيبان فى تسمياتهم لاماكنهم السكنية زى منطقة " حدفونا " القريبة من مرسى علم .
*ثانيا : ما اتوقعتش و انا رايح القافلة دى ان الناس هتستقبلنا بالورود والطبل البلدى لكن ما اتوقعتش ان الناس هتفضل غير سعيدة , جالى شعور ان الاصل فى هذه المنطقة المهملة على كل المستويات ان ناسها يكونوا غير سعداء ,فالناس هناك مش حابين المكان لان المكان مش بيحبهم ,المكان الذى يبخل عليهم بمسكن مناسب و ملبس مناسب و تعليم صحى مناسب وخدمة صحية مناسبة
واتذكر ان بعد اليوم التانى فى القافلة و ده كان يوم الشغل فيه قليل لحد ما لان القافلة انقسمت جزئين
جزء راح حلايب و ابورماد و جزء بقى فى شلاتين فخرجنا ناخد صور تذكارية قدام المستشفى ففيه بنات وستات
كانوا معديين قالولنا بسخرية "حد يجى يتصور فى شلاتين ,دا احنا عايشين فيها بالغصب"
انا فعلا حسيت بصدق الكلمة دى وده يمكن السبب اللى مابيخليش المسؤلين الكبار يروحوا يتصورا هناك
لانه ما ينفعش تتصور فيها و هى كده ,طورها واهتم بيها شوية وبعدين اتنطط براحتك
*ثالثا : بالنسبة لموضوع الحدود انا ماتكلمتش مع كتير من الناس هناك فى الموضوع ده
لانها مش وظيفتى ومش ده اللى قافله جايه علشانه لكن من المرات القليلة اللى اتفتح الموضوع فيه
لاحظت ان الناس هناك معندهاش مشاكل فى موضوع القوميات و الانتماءات ده و هما بيعتبروا نفسهم فى عزله اصلا
لا هم طايلين شمال و لا طايلين جنوب ,اعتقد ان هؤلاء الناس سيعتزوا بمن سيهتم بهم ومن سيعطيهم حقوقهم المشروعة و البسيطة جدا فى العيش الكريم .
*رابعا: طبعا احنا فى مصر تعودنا على ان وجود الشعارات السياسية و الثورية على الجدران بقى جزء من (لايف ستايل ) بتاعنا زى لما تصحى الصبح تدخل الحمام و تغسل وشك و حتما هناك جرافيتى انت راسمه او شاهده 
هناك مفيش الكلام ده تماما الحيطان نضيفه تماما اللهم الا صوره للسيسى على الكمين اللى فى اول شلاتين وللمفارقة اسم عدلى منصور على نصب تذكارى لمحطة اتوبيس هناك 
.. وده بيعكس ان هما على مدار السنوات الماضية اللى الناس فيه على اختلافها " من ثوار و فلول و..و... " شافوا مصلحة البلد او مصلحتهم حتى مع التيار ده
وفى الوقت اللى الناس كلها كان عندها امل فى التغير , الامل كان منقطع عندهم وده من مخلفات سياسة التهميش اللى هما عانوا منها على مر العصور (وده احد اسبابه انهم لا يمثلوا كتلة تصويتية كبيرة فتعداد سكان شلاتين ربما لا يتجاوز 30 الف بينما حلايب و ابورماد ممكن لا تصل ل 10 الاف ولا حاجه) و اعتقد ان استمرار السياسة دى سيؤدى لكارثة حقيقية فى هذه المنطقة و فضيحة مروعة لمصر لان اللى ساتر العملية هناك بعد ربنا الجيش لو اى حاجه كده و لا كده لا قدر الله .. يبقى بخ !
*خامسا : لاحظت اسلوب حياة الناس هناك يتسم بالبدائية و البساطة الشديدة فبالنسبة للاعمال التى يقوم بها الناس هناك لا تتجاوز بعض الحرف البسيطة و المشاريع الخاصة التى تخدم سكان المنطقة وما دون ذلك فان اغلب السكان يعملون فى الرعى , لم الاحظ وجود بقعه زراعية هناك فالمنطقة كلها صحراء و لا اعرف سبب عدم وجود بقعة زراعية رغم ان ارض المنطقة مستوية على عكس معظم الاراضى اللى شوفناها و اللى بتمثل جبال صعبة , كما ان بعضهم يعمل فى البحر الا ان قيل لنا ان البحر هناك شديد الخطورة و ده لانك لو عاوز تعمل شاطئ امن زى الغردقة او مرسى علم فانك لازم هتطرد الاسماك المفترسة جنوبا و مفيش جنوب اكتر من المنطقة دى (اللى بتبعد 140 كيلو عن #حلايب, حلايب اللى بتبعد تقريبا 20 كيلو عن #ابو_رماد اللى بتبعد عن حدود السودان حوالى 20-30 كيلو اخرى)
,طبعا مش محتاج اقول ان السيدات هناك لا تعمل وده مش بدافع دينى و لا حاجه ( المجتمع مختلط عادى اللهم الا الالتزم بعادتهم وتقاليدهم الخاصة بالتعامل بين الرجل والست اللى بتتشابه من مكان لاخر فى مصر مع بعض اللمسات اللى بيحطها كل مجتمع لنفسه)
و لكن لان مفيش شغل اصلا ربما بيساعدوا ازواجهم
و اهل حلايب بيتكلموا اللغة العربية لكن بعض السكان مش بيتكلوا الا لغة هناك اسمها " روتانة" و خصوصا الناس اللى مش بيتعاملوا كثير باللغة و اللى مش بيخرجوا من مناطقهم الا لاغراض المعيشة من مأكل و مشرب فقط
,شوفت جنسيات تانيه هناك من تشاد و من اوغندا على ما اتذكر لكن لا اعرف كيف وصلوا ولا ايه قصتهم و هل معاهم جنسية مصرية ولا لا وهل هم مقيمين اصلا ولا لا
*سادسا : بالنسبة للموارد الموجودة فى المنطقة لا اعرف كيف بمنطقة بها ايد عاملة ومساحة شاسعة من الارض و بحر ( يقال ان تحته نفط حاولت شركة كندية بتكليف من السودانيين ان تنقب عنه فى التسعينات و لكن مصر اعترضت وخُلقت ازمة دبلوماسية و توقف المشروع ) ان تظل على بدائيتها حتى العام ال2014 من الميلاد !
*ده ملخص الرحلة الى الجنوب الغربى الاقصى لمصر اللى استمرت 3 ايام بايجاز واوعدكوا لو افتكرت حاجه تانية هانكد عليكوا واكتبها 



ليست هناك تعليقات:

إرسال تعليق